MAIATZAK 10, IGANDEA - CINQUE TERRERAKO TXANGOA

Igandean Cinque Terrera egin genuen txangoa. Bidaiako egunik berezienetako bat izan zen, Italiako kostaldeko herri ospetsuenetako batzuk bisitatzeko aukera izan genuelako. Ibilbidean zehar paisaia ikusgarriez gozatzeko aukera izan genuen: itsasoaren ondoan kokatutako koloretako etxeak, itsaslabarrak eta xarma handiko portu txikiak ikusi genituen. Turismoa egiteaz eta argazki ugari ateratzeaz gain, txangoak taldea gehiago elkartzeko eta eskola girotik kanpo elkarrekin denbora partekatzeko ere balio izan zuen.

MAIATZAK 11, ASTELEHENA – ESKOLA, ESKULTURA TAILERRA ETA PODCASTA

Astelehenean hasi genituen proiektuko jarduerak Italiako eskolan. Lehenik eta behin, instalazioetako bisita gidatua egin genuen, Italiako ikasleek nola ikasten duten eta haien hezkuntza-zentroak nola funtzionatzen duen hobeto ezagutzeko. Ikasgelak, gune komunak eta arte eta sormen proiektuetarako erabiltzen diren espazio batzuk bisitatu genituen; horri esker, irakaskuntza-metodologia desberdinak alderatu eta hango ikasleekin iritziak partekatzeko aukera izan genuen.

Gero, Carrarako eskultura tradizionaleko tailer bat bisitatu genuen. Bertan, eskultore profesionalek egiten duten artisau-lana gertutik ezagutzeko aukera izan genuen. Carrarako marmol ospetsua ezagutu genuen, bere kalitateagatik mundu osoan ezaguna den materiala eta historian zehar artelan askotan erabilia izan dena. Ikasleek eskulturak sortzeko erabiltzen diren tresnak eta teknikak ikusi zituzten, eta prozesuaren hainbat fase praktikatzeko aukera ere izan zuten, marmol bloke bat artelan bihurtzeko behar diren ahalegina, zehaztasuna eta sormena ulertuz.

Bisita oso aberasgarria izan zen; izan ere, Italiako artea eta tradizioa ezagutzeaz gain, esperientzia praktiko eta kultural interesgarria bizi izan genuen. Eguna amaitzeko, proiektuko podcastaren prestaketa lanekin hasi ginen: ideiak antolatu, zereginak banatu eta egun bakoitzeko jarduerak zehaztu genituen.

MAIATZAK 12, ASTEARTEA – FLORENTZIA, ERRENAZIMENDUAREN SEHASKA, ETA PISAKO DORREA

Maiatzaren 12an goizean goiz abiatu ginen Florentziara, eguna ahalik eta gehien aprobetxatzeko. Bidean, ikasleek Italiako hiri garrantzitsuenetako bati buruz eta Errenazimentuaren sehaskari buruzko ideaia nagusiak eta espero zituztenak partekatu zituzten. Iristean, Galileo Museoan hasi genuen bisita. Zientziaren historiari eta Galileo Galileiren figurari eskainitako espazio honetan astronomiarekin, fisikarekin eta matematikarekin lotutako tresna historiko ugari ezagutu genituen, baita zientzia modernoaren garapenean funtsezkoak izan ziren aurkikuntzak ere. Bisita oso interesgarria izan zen, ikasleek ezagutza zientifikoak Europako garapen historiko eta kulturalarekin lotzeko aukera izan baitzuten.

Museoa bisitatu ondoren, Florentziako gune esanguratsuenetako batzuk ezagutzeko denbora izan genuen. Kale historikoetan barrena ibili ginen, hiriaren arkitektura errenazentista ikusgarriaz eta ondare artistiko handiaz gozatuz. Monumentuak, plazak eta eraikin historikoak ikusi genituen, Florentzia Italiako kultur erreferente nagusietako bat bihurtzen dutenak. Arteari eta historiari buruz ikasteaz gain, hiriko giroaz gozatu genuen eta gure ikasle euskaldunek, italiako ikasleekin batera elkarrekin bizitzeko eta esperientziak partekatzeko aukera izan zuten.

Egunak, gainera, ustekabeko sorpresa bat ere eman zigun: Pisa bisitatu ahal izan genuen. Inork espero ez zuen geldialdi horrek eguna are bereziago bihurtu zuen. Bertan, Pisako Dorre Oker ospetsua ikusi genuen, Italiako monumentu ezagunenetako eta adierazgarrienetako bat. Mirarien Plazan paseatu genuen, monumentu multzoaren edertasunaz gozatu eta argazkiak ateratzeko aprobetxatu genuen. Pisa bisitatzea bidaiako unerik zirraragarrienetako bat izan zen.

Esperientzia modu oso berezi batean amaitzeko, denok batera “Sara perché ti amo” abestu genuen Pisako Dorrearen azpian. Une dibertigarri eta hunkigarria izan zen, bidaiako oroitzapenik onenetako bat bihurtu zena. Ikaskuntzaz, elkarbizitzaz eta esperientzia ahaztezinez beteriko egun bati amaiera emateko modu ezin hobea izan zen.

MAIATZAK 13, ASTEAZKENA– PODCASTAREN GRABAZIOA, CARRARAKO TOURRA ETA TAILERRAK (ARTEA, MOSAIKOA ETA TEKNOLOGIA)

Maiatzaren 13an eguna proiektuko podcastaren grabazioarekin hasi genuen. Ikasleek modu aktiboan parte hartu zuten grabazioetan, mugikortasunean bizitako esperientziak, iritziak eta ikasitakoa partekatu zituzten. Jarduera oso aberasgarria izan zen, ahozko adierazpena, talde-lana eta sormena lantzeko aukera eman baitzien, eta aldi berean Italian egindako jarduera guztien oroitzapen bateratua sortu baitzuten.

Ondoren, Carrara hirian zehar tour bat egin genuen. Hiri hau nazioartean ezaguna da bere marmol-harrobi ospetsuengatik. Ibilbidean zehar Carrarako marmolaren historia eta garrantzi kulturala eta ekonomikoa hobeto ezagutu genituen. Erromatarren garaitik erabiltzen da hiriko marmola eta arte eta arkitektura lan ospetsu askotan presente dago. Hiriko kaletan barrena ibili ginen, bertako ondare historikoa eta giro berezia ezagutuz.

Egunean zehar Italiako eskolak antolatutako hainbat tailerretan ere parte hartu genuen. Arte tailerrean, ikasleek marrazketarekin eta adierazpen artistikoarekin lotutako jarduerak egin zituzten. Mosaiko tailerrean, antzinako teknika hau ezagutu eta beren sorkuntzak egiteko aukera izan zuten. Teknologia tailerrean, berrikuntzarekin eta tresna digitalekin lotutako jardueretan parte hartu zuten.

Eguna bete betea eta anitza izan zen; ikasleek gaitasun artistikoak, teknologikoak eta komunikatiboak garatu ahal izan zituzten, Italiako ikaskideekin esperientziak partekatzen jarraitzen zuten bitartean.

MAIATZAK 14, OSTEGUNA - OSTALARITZA INSTITUTORA BISITA

Maiatzaren 14an Alberghiero Ostalaritza Institutua bisitatu genuen. Esperientzia oso interesgarria izan zen, lanbide heziketan eta ikaskuntza praktikoan oinarritutako beste hezkuntza-eredu bat gertutik ezagutzeko aukera eman zigun.

Eguneko unerik berezienetako bat institutuko ikasleek prestatu ziguten brunch-a eta bazkaria izan zen. Haiek egindako zenbait plater eta elaborazio dastatu genituen, eta horri esker haien maila teknikoa ez ezik, eguneroko lanean jartzen duten ahalegina eta dedikazioa ere baloratzeko aukera izan genuen. Esperientzia oso atsegina izan zen eta oso giro onden hartuak sentitu ginen.

Halaber, Italiako heziketa mota honek eskaintzen dituen aukera akademiko eta profesionalak ezagutu genituen, eta hezkuntza interes eta lanbide desberdinetara nola egokitzen den hobeto ulertu genuen. Italiako ikasleekin egindako trukea oso positiboa izan zen, esperientziak partekatu, galderak egin eta haien egunerokoa ezagutzeko.

Eguna oso hezitzailea eta desberdina izan zen, beste ikaskuntza modu batzuk ezagutzeko eta Italiako kulturaren eta ekonomiaren sektore garrantzitsu batera gerturatzeko aukera eman zigulako.

MAIATZAK 15, OSTIRALA - AGURRA ETA MILAN

Ostiralean gure mugikortasuneko azken eguna izan genuen Italian. Emozioz eta une bereziz beteriko eguna izan zen, aste osoan zehar lagundu gintuzten ikaskide eta irakasle guztiei agur esan behar izan genien. Jarduerak, esperientziak eta ikaskuntzak partekatu ondoren, pozak eta agurraren tristurak markatu zuten momentua.

Goizean zehar Italiako eskolan antolatutako jardueratan parte hartu genuen. Nabarmenetako bat Aula Magnan ospatutako musika ikuskizuna izan zen. Eskolako beste ikasle batzuek prestatutako emanaldiaz disfrutatu zuten, euren talentu artistikoa eta musikala erakutsiz giro parte-hartzaile eta hunkigarri batean. Musikak proiektuko parte-hartzaile guztiak elkartzeko balio izan zuen eta mugikortasunari amaiera berezia emateko modu ederra izan zen.

Ikuskizunaz gain, Italiako lagunekin azken uneak partekatu genituen: oroigarriak, argazkiak eta agur-mezuak trukatuz. Esperientzian zehar ikasitako guztiari buruz hausnartzeko unea izan zen: kultura-trukea, elkarbizitza, talde-lana eta ikasteko eta harremanak egiteko modu berriak ezagutzea.

Astean zehar ez genituen soilik gure hizkuntza eta kultura gaitasunak hobetu; adiskidetasuna eta betiko oroitzapenak ere sortu genituen. Agurra besarkadez, eskerronez eta emozioz beterik egon zen, parte-hartzaileen artean sortutako lotura handia agerian utziz.

Bidaia esperientzia paregabe eta ahaztezina bizi izan genuenaren sentsazioarekin amaitu genuen: ikaskuntzaz, hazkunde pertsonalaz eta une oso bereziz betea.

Itzuli aurretik, Milan bisitatzeko zortea izan genuen eta esperientzia ikaragarria izan genuen: Piazza del Duomon Radio Italiaren kontzertu handiarekin topo egin baikenuen. Plaza jendez eta zuzeneko musikaz beteta zegoen, giro ikusgarriaz gozatu genuen Milango katedral ospetsuaren aurrean. Bidaiari amaiera ezin hobea emateko modua izan zen, eta Erasmus+ proiektuko gure parte-hartzea are bereziago bihurtu zuen.

Laburbilduz, Erasmus+ proiektuari lotutako mugikortasun aste honek eduki akademikoak baino askoz gauza gehiago ikasteko aukera eman zigun. Pertsona berriak ezagutu genituen, gure ingelesa eta italiera hobetu genituen, hiri zoragarriak bisitatu genituen eta betiko gogoratuko ditugun esperientziak bizi izan genituen.